艾佳食品行
台北縣中和宜安路１１８巷１４號
０２－８６６０－８８９５
http://sh1.yahoo.edyna.com/aigafood/index.asp
係捷運中和線南安市場落車，出站後向左直行約5-10分鐘後左轉入小路，會有路牌指示宜安路。呢間比起洪春梅及飛迅大，貨品款式比較多。

洪春梅實業有限公司
台北市民生西路３８９號
０２－２５５３－３８５９
淡水線雙連站落車，出站後直行約15-20分鐘，要小心睇清楚單數街邊是在左邊還是右邊。洪春梅由早上9:30至夜上6:30，星期日休息。格局似陳枝記，但舖面好細同殘舊，我自己唔覺佢太多野賣。

飛迅烘焙材料行
台北市士林承德路四段２７７巷８３號
０２－２８８３－００００
http://www.cakediy.com.tw/
淡水線士林站落車，沿中正路直行約20分鐘，途中會見到右手邊有一間陽明高中，再行無耐你就會見到飛迅個招牌，見到條小路左轉行約30秒便到達。貨品種類都幾多，蛋糕盒都幾靚，最平係木模。
其實由士林夜士行過去可以，但會比較遠。
 
http://community.webshots.com/album/548206693jPOHJx/1
我係跟4日團，第一同第二日我地都跟足行程，但第三日下午同第四日我地自己走開左。

Day1：坐十點半機，約十二點出到台灣機場。
第一站：
1.    101大廈：於food court午饍，food court類似city’super，裡面仲有一supermarket，supermarket側仲有一間麵包舖，麵包全部都好靚。
2.    新光三越：係101大廈旁邊，我地去左最近果一間，係地下food court我地試食左老董牛肉麵，湯底真係好濃，麵都幾煙un，值得一試。
總結：兩個商場都無乜野行，都係賣名牌物品。

第二站美麗華高場：
1.    底層有好多counter，賣手信同埋冇supermarket，我係裡面買左小林瓦片餅，味道其實無乜特別，但每一片上面都有唔同既圖案，送禮幾好架。
2.    誠品書店：唔記得係第幾層，但呢間唔係好大，書種類都唔算太多，但我都買左兩本書。
3.    snoopy world：有間專賣snoopy產品既舖頭，都好多款架。

第三站新士林夜士：
1.    求奇搵間食左炸臭豆腐同蚵仔煎，炸臭豆腐同香港唔同，台灣係炸完後切細件，加埋d酸菜同埋汁，唔算臭，但好香口，都幾好味道。蚵仔煎完全唔好食，唔脆，仲要係好杰咁，加埋個汁仲難頂呀。
2.    大包包細包：最多人排隊果一間，有鹹甜之分，我地食左鹹花生味。個鹹係一塊類似酥皮既野，再用一塊似薄餐包住佢，再加少少花生碎，脆脆地都幾好味架，但我覺得甜應該會仲好味。
3.    係門口左手邊有一間脆皮puff，唔太甜，個皮都幾脆架，如果仲有quota都可以試下食囉。
4.    串燒腸同埋串燒雞心，唔記得邊間囉，好似係中間住置架。燒腸味道有少少似臘腸，但又無咁實身喎。串燒雞心幾香口，掃上面個汁都好食架。
5.    爵林花生糖：無想像中咁好食，但都買左少少做手信。
總結：其實我唔覺得士林夜士d野好食囉，不過導遊推介排骨燉湯我地無食到，因為覺得食完會好飽囉。新士林夜士行前少少會有一路步行街，都係賣下衫同鞋，都有唔少路邊小食檔，但我一間都無試過。

第三站：
約七點幾八點返到一樂園，酒店房都算乾淨，不過係沖涼d水好慢囉。同埋佢好近西門町，出酒店門口直行約10分鐘就到。
1.    阿宗麵線：有分大碗同細碗，我同男友要左碗細。唔知點解我同男友都覺得食落味道有少少怪怪地，但係佢d大腸真係幾淋幾入味，總之我同男友都麻麻地鍾意食，可能係口味問題瓜。
2.    老天祿：100g賣150台幣，我地買左100g鴨舌返酒店食，真係好入味，送啤酒真係好正。但要小心佢只可以放兩至三日，如果想帶返香港一定要最尾一日買，又或者放係冰格。

Day2：
一早係酒店食左個免費早餐，但實在太難食啦，所以再出去搵食。係酒店門口右邊直行過一個路口之後轉右，再行過少少買豆漿同煎蛋餅食。煎蛋餅加少少豉油，都幾好味架喎。
第一站：睇d古蹟。

第二站深坑豆腐街：
1.    係深坑附近一間叫左鄰右里到食旅行團包既餐，都ok架。
2.    深坑街頭右手邊第一檔燒臭豆腐，可以選擇加酸菜，莧茜或者辣酸菜，我地要左辣酸菜。雖然食落口唔多臭，但係加埋d汁一齊燒，都ok既。
3.    街中間有一間賣糖架，果到d南瓜子酥糖好好味，3樽$450台幣。
總結：其實深坑已經無乜人整豆腐，而家似係賣手信多d。果到仲有一間賣豆腐雪條好好味，但係當日賣哂喎。

第三站九份：
1.    舊道口牛肉麵：九份路口第一檔，味道比起老董牛肉麵無咁清，其實比較普通。
2.    礦山薑汁豆花芋圓：同舊道口牛肉麵共同一個舖位，薑汁夠味，豆腐夠滑，但係芋圓似湯丸咁，無乜味道囉。
3.    係李儀記買左20件鳳梨酥做手信，試食過，都幾脆幾好味架，1件15台幣。
4.    係街最尾尾買左1包話梅粉比mum，原來食西瓜時灑少少話梅粉落去會好食好多架，同埋番港係無得賣架。
5.    係街中間有一間賣果凍幾好味，4包450台幣。
總結：今日落雨攪到地面好濕滑，我地無行哂整條街，但上到最頂頂時可以望到好遠既情，都幾靚架。同埋九份仲有好多不同既小食，仲有肉丸，其實導遊介紹左唔少野比我地食，但我地實在太飽囉，食唔哂呀。

第四站回程返一樂園酒店

第五站迪化街：
為左幫朋友買中草藥粉，我地由酒店行到去迪化街，約花左20分鐘，途裝台北市捷運站。

第六站忠考敦化：
1.    鼎泰豐：後車站裡面地圖有教點行，出站後行約3-5分鐘就到。我地叫左一個燉雞湯同埋蟹粉小籠包，雞湯真係幾清，雞亦好淋，蟹粉小籠包唔係好食到蟹粉味，但係真係皮薄肉汁多，值得食架。
2.    牛爸爸牛肉麵：由鼎泰豐行去約5分鐘，兩個人叫左一個300台幣既牛肉麵，裡面有牛筋，牛腩、類似係豬手。個湯係最清甜既一間，但好夠牛肉味 ﹔牛筋夠淋但又唔痴牙﹔豬手同平時我地食果d唔同，味道帶甜，質地比較爽口，但唔un，我男友差唔多一個人食哂成碗呀，佢仲話最鍾意係呢間既牛肉麵。
3.    跟住去左誠品，真係成層咁大，人人都坐係地下睇書。但因為之前我係美麗華間誠品睇過，所以我只係睇左半個鐘書，但無收穫咁走左。

Day3：
今日我地直頭放棄左酒店早餐，去番琴日買過果間買豆漿餈飯食。

第一站：行完故宮博物館後跟團去食午餐，跟住我同男友離團去淡水，行去捷運站其間，我地係徍邊檔買左雙胞胎，其實似似地牛脷酥。

第二站淡水：坐捷運去淡水
1.    淡水呀給：食左肉丸同呀給，肉丸無乜特別，呀給係一舊炸豆腐裡裡面放左粉絲，再加埋個汁，d粉絲係幾好味，但係我唔鍾意個汁d味道，麻麻地咁jek，都係果句啦，口味唔同。
2.    士耳其雪糕：個質感唔多似雪糕，又唔濃古古力味喎。

第三站：
坐捷運去左飛迅烘焙材料行。

第四站雙連站：
去左洪春梅，但好可惜我地去到時已經關門。但竟然路經寧夏路夜士喎，呵呵。
1.    蚵嗲/蔥卷：唔知間舖叫乜名，蚵嗲其實係一塊餅咁，有好多蔥同埋少少蠔，炸起都好好味架。蔥卷係艽菜加蔥卷埋一齊炸，我同男友鍾意食蔥，所以兩樣都覺好好味道。
2.    炸大腸：係街尾專賣滷味既小檔買，係大腸裡面有一條蔥，再炸一炸佢，食完令我諗起源燕,既炸大腸呀。
3.    麻油雞：又係唔記得舖頭名，一碗湯裡面有幾舊大大舊既雞，雞係幾滑，但同埋d湯一樣都無乜味道，唔食無乜損失。
總結：唔算太多物別野食，但個蚵嗲真係超正呀。

第五站返碧瑤酒店：
今晚因為轉酒店關係，我地改左住忠考敦化附近既碧瑤，返到酒店後再出發去食過。

第六站饒河街夜士：
由酒店坐的士去都係100台幣。
1.    阿根臭豆腐：係一件件炸臭豆腐，中間加少少醬，又脆又好味。
2.    福州胡椒餅：好脆好好味，裡面充滿肉汁，加埋d蔥係裡面，勁好味呀。
3.    竹筒飯：係一間賣鐵板燒既舖頭買，裡面係糯米，但唔好味囉。
4.    珍珠蟹：一隻隻好細隻，炸到可以成隻可以食哂，但其實無乜味道囉。
5.    蔥抓餅：用皮包住一類似油酥餅既物體，加蛋再加蔥煎一煎佢，其實幾好味，但係覺得唔係太特式囉。
總結：我覺得呢個夜士既野最好食，但因為之前幾日食得太多野，所以好多野想食都無食到。

Day4：
今日訓到十點先起身，跟住食左個包就出發去洪梅春。

第一站洪梅春：
路經肚餓係街邊食左個炒麵同尤魚湯，係好地道既台灣小食，都幾好味架。

第二站南安士場艾美：

第三站微風廣場：
1.    麵魂：food court裡面食左個豬骨拉麵，湯底同麵都只係ok。
2.    魚生：係超市裡面買左三文魚同甜蝦，真係好鮮甜。
3.    food court上一層有一間賣麵包，我地買兩個包包諗住上機食。
第四站5點半我地返酒店等車去機車啦

第五站機場：
我地坐當晚九點鐘機，我地係機場burger king食左一個芝華堡餐加洋蔥圈，個洋蔥圈好好味呀，好耐無食過囉。

返到香港，我係巴士上面食埋係微風廣場買既酥皮腸仔包，估唔到個包仲係咁脆喎。男友就係返到屋企後先食佢個包，佢果係法式煙肉芝士包，雖然淋左，但係用個焗爐re-heat後，個包又脆又夠鹹香，男友係咁話正呀。

以上資料希望對大家日後去台灣有用啦, 同埋捷運站既服務人員好好人架, 如果你想去一個地方唔知係邊一個站落車, 佢地會幫你問人架. 總括0黎講, 呢次旅行我同男友真係食左超多野囉, 多到我地返到香港後要小息幾日, 食飯d清淡少少既野.